حاولت أسلي خاطري | قصيدة محمد سعد

عن القصيدة

«حاولت أسلي خاطري» قصيدة للشاعر محمد سعد عن كتمان الوجع والصبر وموازنة العقل والقلب، وحفظ الكرامة أمام الهجر والنكران.

نص القصيدة

حاولت اسلي خاطري قدر الإمكان

لكن همومي كلّ يومٍ كثيره

ما هوب طبعي أشتكي عند خلّان

لكن جروح الصدر والله غزيره

أخفي لهيب الجمر عن كل إنسان

وعيني تبيّن ما تخبّي السريره

أضحك مع العالم وأنا كلي أحزان

وأقول يالله يُسر بعد العسيره

أمشي مع درب الصبر دوم حيران

وأخشى نقى نفسي تغيّر مسيره

العقل ينصحني بحجّة وبرهان

والقلب عيا لا يطاوع مشيره

إن قلت أبنسى صاح بي صوت الأشجان

وإن قلت ابذكر زاد جرحي سعيره

بين السكوت وبين توضيح ما كان

قصرت هقاوينا وصارت قصيره

أخشى الكلام يصير للسرّ إعلان

وأخشى السكوت يزيد نفسي مريره

ما كان كتمان المشاعر به إحسان

بعض السكوت احيان يجرح ضميره

ولا كلّ بوحٍ يزرع الودّ بأغصان

بعض الحكي نارٍ تلضّى خطيره

أقيس قولي قبل ينطق به لسان

وأشوف غاياته وأراقب مصيره

وأصون قدري عن مذلّة ونقصان

والنفس لا هانت تراها كبيره

أقرب إلى من شفت في القرب سلوان

وأبعد عن اللي بالردى طار طيره

ما كلّ وجهٍ ضاحكٍ يضمر احسان

كم حاقدٍ يخفي وراها ضميره

ولا كلّ من قفّى عن العين نَسيان

يمكن غلاه بداخل القلب ديره

وأفرّق بعين العقل خافيٍ بان

وأعرف من ضنوني حقيقة مصيره

تقابل إحساني بهجرٍ ونكران

وانا جروحي من طعونك كثيره

محمد سعد